ملګري ملتونه: د افغان ښځینه فعالانو او د دوی د خپلوانو د ازادولو لپاره دې اقدامات وشي
د پروانې ابراهیمي او تمنا پریاني او د پریاني د درېیو خوېندو له تري تم کېدو ۱۵ ورځی تېریږی، خو د پېښی په اړه د نړیوالو غبرګونونو سره سره، تراوسه د یادو ښځو د برخلیک په اړه معلومات نه شته.
اوس د ملګرو ملتونو د بشري حقونو څانګې په یوه اعلامیه کې ویلي چې د دغو شپږو ښځینه فعالانو او د دوی د نېږدې خپلوانو د ژر او له خطر پرته خوشې کېدو لپاره باید ټول ممکنه اقدامات ترسره وشي.
د یاد سازمان په اعلامیی کې راغلی: "موږ د هغو شپږو کسانو د تري تم کېدو په اړه جدي اندېښمن یو چې دوه اوونۍ دمخه په کابل کې د ښځو د حقونو د غوښتنې د لاریون په تړاو وتښتول شوې. موږ د دوی د سلامتۍ او امنیت په اړه جدي اندېښنه لرو."
دا په داسې حال کې ده چې د ملګرو ملتونو د بیان پر بنسټ، د یادو کسانو د تري تم کېدو د څېړنو په اړه د طالبانو دحکومت له رسمي علان سره سره، تراوسه د یادو ښځو د ځای په باب تائید شوي معلومات نه شته.
په همدې حال کې هغه ښځې چې د اروپا د پارلمان غونډه ته بلل شوي، ناروې ته د طالبانو پر ورغوښتلو نېوکه کړې.
د اروپا د پارلمان د پرون ورځې غونډی یوې افغان ګډوانوالې حوریې مصدق وویل:" دا د شرم ځای دی چې موږ د بشري حقونو د فعالانو په توګه باید د [د اروپا د ویزی د ترلاسه کولو لپاره] دي ټولو پوښتنو ته ځوابونه ووایو، خو تاسو له هغی ډلې د سرې غالۍ په غړولو سره هرکلی کوئ چې نه یوازي په ترهګریزو فعالیتونو مشهور دي، نه یوازي دا چې یو جنسي اپارتاید رژیم دی، بلکې د کابینې د څه باندی نیمایي غړو نومونه یې د ملګرو ملتونو د بندیزونو په نوملړ کې شامل دي."
د تمنا او پروانې له تري تم کېدو وروسته معترضې ښځې په پټو او نا څرګندو ځایونو کې خپلو اعتراضونو ته دوام ورکوي.
هغوی نن چهارشنبی هم د خپلو ملګرو د برخلیک نه معلومېدو او دغه شان د دوو خبریالانو د د نیول کېدو په تړاو اعتراض وکړ.
اعتراض کوونکې شایسته صافۍ وایي:" ډیري هڅي مو وکړې، په سرپوښوځایونو کې مو د حق غوښتنی غږ پورته کړ، پر خپلو لاسونو مو د هغوی نومونه ولیکل، فېسبوکي هشټګونه مو پیل کړل، خو هېڅ ډول بدلون رانغی. د نجونو د ازادېدو په تړاو هېڅ راز معلومات نه شته، حتا موږ د هغوی له وضعیته خبر نه یو."
پروانې او تمنا له نیول کېدو دوه ورځې مخې د حجاب په اړه د طالبانو د وروستیو اقداماتو په وړاندې سوله ییز لاریون کې ګډون کړی وو.
له دې اعتراض وروسته د جنوري میاشتې په ۱۹ نېټه ماښام مهال کله چې پروانه ابراهیمي او لیور یي د کور پر لور روان وو، وتښتول شول.
په هماغه شپه بیا تمنا پریاني او درې خوندې یې هم له خپل کوره تښتول شوي.
له دوی وروسته د هغو نورو ښځو د کورونو د پلټلو په اړه هم راپورونه خپاره شوي چې په یاد لاریون کې یې ګډون کړی وو.