پر افغانستان د پاکستان بريدونه؛ د طالبانو چوپتیا غبرګونونه راپارولي
د خوست ولايت د سپېرې او تڼیو په سیمو کې د وزیرستانیو کډوالو ته مرګ ژوبله اوښتې.
دغه راز په کونړ ولايت کې هم هوايي بريدونه شوي دي چې مرګ ژوبله لري.
د پېښې ټپيانو او عیني شاهدانو ازادي راډیو ته ویلي چې تر دې دمه شاوخوا دېرش کسان وژل شوي او څه باندې شل تنه نور ټپیان شوي.
له دغه بریده څو ساعته تېر شوي خو لا هم د طالبانو رسمي ویاندویانو د دوی د حکومت دریځ نه دی معلوم کړی.
د طالبانو ویاند ذبیح الله مجاهد او د هغه مرستیالانو په دې اړه زموږ پوښتنې بې ځوابه پرېښې دي.
د طالبانو دې چوپتیا په خواله رسنیو د ګڼو خلکو تُند غبرګونونه پارولي دي.
په عامو خلکو سربېره چې د خوست او کونړ د ټپیانو او مړو ویډیوګانې او عکسونه یې شریک کړي پخوانیو حکومتي چارواکو هم سخت انتقادونه کړي.
له دې ډلې پخواني مرستیال ولسمشر امرالله صالح ویلي چې دا لومړی ځل دی چې د پاکستاني هوايي ځواک د افغانستان خاوره بمبار کړې.
هغه زیاته کړې له دې چې کابل د ده په خبره یوې نیابتي ډلې په واک کې دی د دغه ښکاره برید له عواقبو هېڅ اندېښنه نه لري.
د پخوانۍ اردو یوه لوړپوړي جنرال سمیع سادات هم په خپل فیسبوک لیکلي چې افغانستان د پاکستان تر مستقیمې پوځي حملې لاندې راغلی او باید دا بریدونه سمدستي ودریږي. هغه د داسې یوه وضعیت په رامنځته کېدو کې طالبان پړ بللي.
د میدان وردک پخوانۍ ښاروالې او د ښځو د حقونو فعالې ظریفه غفاري هم په خپل ټوېټر په طالبانو انتقاد کړی چې په پاکستان کې د خپلو شخصي ګټو او کورنیو د خوندیتوب لپاره له ملي ګټو تېر دي.
د پاکستان پوځ لا پر افغان خاوره د هوايي برید په تړاو څه نه دي ویلي خو دوه ورځې وړاندې د پوځ ویاند بابر افتخار وویل چې د پاکستاني طالبانو پر ضد خپلو عملیاتو ته زور ورکوي.