يو شمېر مېرمنې: افغانې ښځې حجاب لري، خو ډوډۍ نه لري
یوشمېر افغان مېرمنو د طالبانو د حکومت د هغه فرمان په اړه غبرګون وښود چې د افغان مېرمنو د حجاب په اړه یې صادر کړی.
دوی وايي، افغانستان کې ښځې حجاب لري خو ډوډۍ نه لري، د دوی په خبره دا شرم دی.
يوه مېرمن چې ازادي راډيو ته يې پېغام را استولی د ښځو د اقتصادي ستونزو خبره کوي، او له طالبانو غواړي، چې د حجاب د اجباري کولو پر ځای، د خلکو په ځانګړي ډول د ښځو د ګېډو مړولو لپاره یو چاره وسنجوي.
په افغانستان کې د ښځو د حجاب د اجباري کېدو په اړه د طالبانو د فرمان او په اړه یې د نړیوالو له غبرګونونو ورسته، یو شمېر افغان ښځو هم د طالبانو د دې پرېکړې په اړه غبرګون ښودلی دی.
دوی چې نومونه یې نه دي اخیستي، ازادي راډیو ته د پېغامونو په استولو سره ویلي، اجباري حجاب نه مني.
يوې مېرمنې ويلي:" زه انسانه یم، د اختیار خاونده او د انساني او بشري حقونو درلودنکې، نه د اجباری حجاب لپاره."
يوې بلې مېرمنې په پېغام کې ويلي:"د دین منل جبر نه دی، اجباري حجاب د فرد په انتخاب و سلیقه تېری دی، موږ هیڅکله اجازه نه ورکوو چې څوک زموږ د انتخاب او پوښښ په موضوع تعرض وکړي."
د ښځو د حقونو فعاله زهرې نایبي هم ازادي راډیو ته په یو استولي پېغام کې ویلي، چې طالبان د شلو مخکې کلونو په پرتله هیڅ نه دي بدل شوي.
نوموړې ويلي:"زما پېغام طالبانو ته دا دی، چې تاسې همغه د شلو مخکې کلونو طالبان یاست، خو موږ د شلو مخکې کلونو ښځې نه یو، تاسې نور محدودیتونه مه لګوئ او د افغانستان ښځې تېر ته نه ستېږي"
دا ښځې له نړیوالې ټولنې غواړي، چې ژر تر ژره هغه محدودیتونه، چې د طالبانو حکومت پر ښځو لګولي لرې کړي.
دا په داسې حال کې ده، چې د طالبانو مشر ملا هبت الله اخندازه په یو تازه فرمان کې د امر به معروف و نهی از منکر وزارت نه غوښتي، چې په ښځو باندې حجاب په اجباري ډول عملي کړي او د امکان تر بریده باید ښځې په کور وي.
د طالبانو حکومت د شنبې په ورځ د ثور میاشتې په ۱۷ مه د یو فرمان په صادرولو سره وویل، چې ښځې دې په عمومي ځایونو کې خپل مخونه پټ کړي او له اړتیا پرته دې له کوره نه وځي. په فرمان کې راغلي چې د سرغړونې په صورت کې به د کور مسوول مجازات شي.
دا فرمان په افغانستان کې دننه او بهر له غبرګونونو سره مخ شو، ان تر دې چې د بشر د حقونو د څار سازمان د ښځو د حقونو له ملاتړو هېوادونو وغوښتل، چې د طالبانو د دې پرېکړې په تړاو بېړنۍ ناسته وکړي.
په ورته وخت کې دیني عالم محمد محق وايي، کوم حجاب چې طالبان یې خبره کوي قراني بنسټ نه لري.
نوموړی وايي:"که چېرې قران کریم بنسټ ګرځول کېږي، د جامو اغوستلو موضوع له ازادیو سره مل ده او ان قران په دې اړه چې د ښځو سر، لاسونه او تر بندونو پورې دې پښې وپوښل شي څه نه دي ویلي، په دې اړه د قوانینو وضع کول او بیا مجازات قراني اصل نه لري."
نوموړی وايي، چې دا شان ټینګار تر ډېره سیاسي اړخ لري او طالبان تر ډېره پر ټولنه د خپل نفوذ او او د کړنو د ځپلو لپاره د وسیلې په توګه دا موارد کاروي.
هڅه مو وکړه په دې اړه د طالبانو د حکومت نظر هم ولرو د امر به معروف و نهی عني المنکر وزارت نظر هم واخلو، خو ویاند سره یې په خبرو بریالي نه شوو.
د طالبانو حکومت مخکې تر دې هم د ښځو پر زده کړو او ټولنیزو فعالیتونو محدودیتونه لګولي وه، چې په کور دننه او نړیواله کچه له غبرګونونو سره مخ شول.