کابل لویدیځ کې پرله پسې چاودنې؛ طالبانو ځانګړي امنیتي تدابیر نیولي
رویټرز اژانس د کابل په پل سوخته سیمه کې د پرونۍ چاودنې د قربانیانو شمېر ۸ او د ټپیانو ۲۲ یادوي.
د طالبانو د امنیه قومانداني ویاند خالد ځدراڼ د چاودنې په لومړیو شېبو کې ازادي راډیو ته ویلي و، چې تلفات کم دي دومره نه دي لکه څومره چې یې ځینې رسنۍ شریکوي.
د پرون ورځې په پای کې د امنیه قومانداني په وینا دې چاودنې د دوو کسانو ژوند واخیست او دوه ویشت تنه نور یې ټپیان کړل.
د همدې سرچینې په وینا د یوه ټپي روغتیایي حالت نازک دی.
د کابل د شپږمې امنیتي حوزې امر مولوي ذبیح اله بیا سیمه ییزو رسنیو ته ویلي دي، چې درې ته وژل شوي او یو شمېر ټپیان شوې دي.
خو رویټرز اژانس د ورکړیو تلفاتو سرچینه روغتیايي مسوولان او عینی شاهدان یادوي.
تر دې چاودنې یوه ورځ مخکې د کابل په بله شیعه مېشته سیمه، سرکاریز کې په چاودنه کې ۸ تنه ووژل شول او ۱۸ نور ټپیان شول.
د دې دواړو چاودنو مسوولیت داعش خراسان څانګې اخیستی دی.
دا پېښې د محرم د لسمې په درشل کې شوې دي.
ټاکل شوې ده، چې دا مراسم د دوشنبې په ورځ ترسره شي.
طالبانو له شیعه وو غوښتې دي، چې د محرم په لسمه د دوی په وینا په لارو کوڅو کې خلکو ته مزاحمت جوړ نه کړي.
په کابل کې د امنیه قوماندني ویاند خالد ځدراڼ په دې اړه ازادي راډیو ته وویل: "له اهل تشیع هېوادوالو سره په ګډه یو کمېسیون جوړ شوی دی څو د دوی د امنیت د لا ټینګښت څارنه وکړي همدا راز د پېښو په وخت ځانونه سیمې ته ورسوي، د دې ترڅنګ دوی ته ویل شوي دي چې تاسو به خپل مراسم تر خپلو امام بارګاهو پورې محدودوئ او په ښارونو کې به عامو افغانانو ته مزاحمت نه کوئ."
په افغانستان کې له څه باندې درې لسیزو راهیسې شیعه افغانان د عاشورا په ورځ د ښارونو لارو کوڅو ته راوځي او د امام حسین ویر کوي، تر دې مخکې به د سولې په کلونو کې دوی د تکیه خانو دننه د محرم د لسمې ورځ لمانځله.