په افغانستان کې د کووېډ۱۹ مثبتې پېښې په ډېرېدو دي
د طالبانو حکومت د عامې روغتیا وزارت مسوولان، په وروستۍ یوه میاشت کې په دغه هېواد کې د کووېډ۱۹ ناروغۍ د زیاتېدو خبر ورکوي او له خلکو غواړي څو روغتیايي سپارښتنې په پام کې ونیسي.
د دغه وزارت ویاند شرافت زمان د دوشنبې په ورځ ازادي راډیو ته وویل، تېره میاشت په کووېډ۱۹ د اخته کسانو شمېر د ټول هېواد په کچه ۲۳۰۰ و خو په روانې میاشت کې درې، څلور زروته لوړ شوی دی.
زمان زیاتوي: "دا چې په دې وروستیو کې په ګاونډیو هېوادونو کې د کووېډ۱۹ پېښې ډېرې شوي، له بده مرغه په افغانستان کې هم د ناروغانو شمېر لوړ شوی. کوم شمېر چې په وروستیو میاشتو کې یې لرو له درې زرو تر څلور زرو پورې دی."
خو زمان د درې او څلورو زرو ترمنځ کره شمېر ونه ښود.
په ورته وخت کې په کابل کې د افغان جاپان په نوم د کووېډ۱۹ ناروغانو د درملنې روغتون د طالبانو د عامې روغتیا وزارت د ویاند د څرګندونو په تاييد سره وايي، چې په وروستیو ورځو کې په دغه روغتون کې هم د ناروغانو شمېر ډېر شوی دی.
د دغه روغتون رییس ډاکتر زلمي رښتین ازادي راډیو ته وویل: "په ورستیو ورځو کې په ورځني ډول تر ۱۰۰ پورې ناروغان مراجعه کوي، دوه درې ناروغان بسترېږي. کله چې مونږ له ۳۰ تر ۴۰ پورې کسانو ازماښت اخلو، ۷ تنه په کې مثبت وي. مثبتې پېښې ډېرې شوي او دا ناروغي مخ په پراخېدو ده."
نوموړي وویل، چې په تېرې میاشت کې د بستر شوي ناروغانو شمېر ۶۵ و خو اوس اویاوو ته لوړ شوی دی.
دا په داسې حال کې ده، چې تازه په کندز ولایت کې د کووېډ۱۹ روغتون مسوولانو هم د کووېډ۱۹ ناروغانو د زیاتېدو خبر ورکړی دی.
د دغه روغتون د ډاکترانو مشر ډاکتر محمد شفیق صادق ازادي راډیو ته ویلي، چې په تېرې یوه میاشت کې دوی په خپل روغتون کې ۷۲۷ مثبتې پېښې ثبت کړې دي.
د طالبانو حکومت د عامې روغتیا وزارت او په کابل کې د افغان جاپان په نوم د کووېډ۱۹ ناروغانو د درملنې روغتون مسوولان وايي، د کووېډ۱۹ ناروغۍ د تشخیص او د ناروغانو د درملنې لپاره، ټول امکانات موجود دي او اوسمهال کومه ستونزه نه لري.
ډاکتران سپارښتنه کوي، چې خلک باید په کووېډ۱۹ ناروغي له اخته کېدو نه د مخنیوي په خاطر، روغتیايي سپارښتنې په پام کې ونیسي، ټولنیز واټن مراعات کړي، خپل لاسونه په اوبو او صابون پرمینځي، په عمومي ځایونو په ځانګړي ډول په سر پټو محلونو کې باید له ماسکه کار واخلي، د پرینجي پر مهال خپلې خولې او پزې ته دسمال ونیسي او ډېر په کور پاتې شي.