اوکراین:مدافع سیستم مو د ایران ۲۲ هغه بې پيلوټه الوتکې غورځولي، چې روسیې پرې نښه کولو
اوکرایني چارواکي وايي د روسیې دا بې پیلوټه الوتکې په جنوبي ښار اودیسې کې د دانیوب سیند پر بندري تاسیساتو د بریدونو د لړۍ پرمهال په نښه شوې.
د دوی په وینا دې بریدونو شاوخوا درې نیم ساعته دوام وکړ.
د روسیې پوځ نن سهار وویل، چې ډرونونو یې تېره شپه د ناټو د غړې رومانیا په سرحد کې د دانیوب سیند پرغاړه د اوکراین بندري تاسیسات چې د غلې دانې د صادراتو لپاره مهم وو، په نښه کړل او ټاکلي اهدف یې ټول وویشتل.
خو اوکرایني چارواکي وايي چې روسیې یې ملکي صنعتي تاسیسات ویشتلي دي.
د اوکراین د لویې څارنوالۍ دفتر پر خپله ټلګرام پاڼه لیکلي، چې په دې حملو کې دوه ملکي وګړي ټپیان شوي دي.
د اوکراین پوځ وايي چې له دې حملو وروسته په تاسیساتو کې لګېدلی اور یې ډېر ژر وژلی دی.
د ترکیې او ملګروملتونو په منځګړتوب د اوکراین د غلې د صادراتو د تړون له فسخ کېدو وروسته دانیوب سیند د دې هېواد د غلې د صادراتو په اصلي لاره بدل شوی دی.
روسیې د دې تړون له فسخ کېدو وروسته پر اودیسې او میکولایف سیمو چې مهم بندرونه او تاسیسات پکې دي او د اوکراین د غلې دانې د صادراتو لپاره مهم دي حملو ته زور ورکړی.
بل خوا د روسیې د ملي امنیت شورا مرستیال دیمیتري مېدوېدیف ادعا کړې، چې د روان کال له پیله تراوسه شاوخوا ۲۸۰ زره کسانو په پوځ کې د شمولیت لپاره غوښتنلیکونه وړاندې کړي.
مېدوېدېف چې د روسیې ولسمشر هم پاتې شوی، دا څرګندونې د لیرې ختیځ سیمې له چارواکو سره په لیدنه کې چې د ده په وینا هدف یې پوځ ته د اوکراین د جګړې لپاره د خلکو جلبول و، وکړې.
مېدوېدېف وویل، چې د پوځ د معلوماتو له مخې د روان کال له جنوري میاشتې راهیسې، د قراردادونو په اساس د احتیاطي ځواکونو په ګډون شاوخوا ۲۸۰ زره کسان د پوځ لیکو ته منل شوي دي.
مسکو تېرکال هغه نوی پلان چې د پوځ په محاربوي برخه کې په سلو کې دېرش زیاتوالی راځي او شمېر یې یونیم میلیون ته لوړېږي اعلان کړ.
د برېتانیا د دفاع وزارت د یوه راپور له مخې، روسیې په وروستیو میاشتو کې د ګاونډیو هېوادونو له وګړو هم غوښتي دي چې د اوکراین په جګړه کې برخه واخلي.