Тоқаев дар байни сафарҳои хориҷӣ ва интихоботи президентӣ
Наталя Пан, ноиби вазири адлияи Қазоқистон гуфт, сафарҳои хориҷии президенти муваққати он кишвар Қосимҷомарт Тоқаев монеи номзад шуданаш дар интихоботи президентӣ намегарданд.
"Ин сафарҳо ба иҷрои вазифаҳо рабт доштанд. Ҷумҳурии Қазоқистон ӯро фиристода буд, ба ҳамин хотир монеи номзад шудани вай намегарданд", - гуфт ноиб-вазири адлия.
Қосимҷомарт Тоқаев бо қарори дабири кулли СММ аз моҳи марти соли 2011 то октябри соли 2013 муовини дабири кул, мудири кулли намояндагии СММ дар Женева фаъолият кардааст. Вай 16 октябри соли 2013 раиси сенати Қазоқистон интихоб шуд.
Қонунгузории Қазоқистон талаб мекунад, ки номзад ба мақоми президентии Қазоқистон бояд на камтар аз 40 сол син ва маълумоти олӣ дошта, забони давлатиро донад ва 15 соли охир дар Қазоқистон истиқомат карда бошад.
Қосимҷомарт Тоқаев рӯзи 9 апрел эълом кард, ки 9 июн дар кишвар интихоботи ғайринавбатии президентӣ баргузор мешавад.