Owganystan: Janyndan geçeniň bombaly hüjüminde 20 adam öldi
Owganystanyň demirgazygynda janyndan geçen bombaçynyň amala aşyran hüjüminde 20 adam, şol sanda “Talybanyň” komandiri öldi diýip, 17-nji iýulda owgan resmileri aýtdylar.
Sar-i-Pul welaýat polisiýasynyň başlygy Abdul Kaýum Bakizoýyň aýtmagyna görä, bu hüjüm oba ýaşululary bilen “Talyban” resmileriniň duşuşan mahaly amala aşyryldy.
Bu hüjümiň jogapkärçiligini häzirlikçe hiç bir topar öz üstüne almady, emma Bakizoý munuň arkasynda “Yslam döwleti” toparynyň bardygyny aýdýar.
Soňky günlerde demirgazyk Owganystanda “Talyban” we “Yslam döwleti” toparlarynyň arasynda ýowuz çaknyşyklar dowam edýär.
Soňky çaknyşyklarda iki tarapyň azyndan 100 söweşijisi öldi diýip, Bakizoý belledi.
Sar-i-Pul welaýat geňeşiniň başlygy Mohammad Nur Rahman gürrüňi edilýän partlamanyň metjitde bolandygyny mälim etdi.