Türmede oturan eýranly aktiwist Monfarediň garşysyna täze aýyplama bildirildi
Iki doganynyň jezalandyrylmagyna nägilelik bildirenligi üçin 13 ýyl türmede oturan eýranly hukuk aktiwisti Marýam Akbari Monfared "sistema garşy propaganda" üçin täze aýyplamalar bilen ýüzbe-ýüz bolýar.
Eýranda adam hukuklaryny goramak boýunça gurama öz çeşmesine salgylanyp, Monfarediň 16-njy iýulda sud edilmelidigini, ýöne onuň aklawçysyna habar berilmändigi sebäpli suda barmakdan ýüz öwürendigini aýtdy.
Monfarediň adamsy Hasan Jafari Azatlyk Radiosynyň Farda radiosyna beren interwýusynda täze aýyplamalaryň mazmuny entek belli däl diýdi.
Monfared 2009-njy ýylyň dekabrynda tussag edilipdi we bäş aýlap zor bilen ýitirim edilipdi.
Ol 2010-njy ýylyň maý aýynda Tährandaky Yslam Rewolýusiýa sudy tarapyndan "milli howpsuzlyga garşy hereket etmek" we "Hudaýa garşy duşmançylyk" sebäpli 15 ýyl azatlykdan mahrum edildi.
Jafari, öz aýalynyň "Mujahedin-e Halk" guramasynyň (MKO) agzalary bolan maşgalasy sebäpli dört minutlyk sud edilip, aýyplanandygyny aýtdy. Doganlarynyň üçüsi 1988-nji ýylda döwlet tarapyndan jezalandyryldy, dördünjisi 1985-nji ýylda gynamalarda öldi.