Bugün Ukrauna Mustaqillik Kününi qutlay
Avgustnıñ 24-ünde, cumaertesi künü, ukrainler, Ukraina mustaqilliginiñ 28 yıllığını qayd ete.
USSR Yuqarı Radası, Ukraina Mustaqilligi qararnamesini 1991 senesi qabul etti. Onı azırlamaq içün bir yarım saat berilgen edi.
Müelliflerniñ biri, sabıq dissident Levko Lukyanenko hatırlağanı kibi, vesiqa, az vaqıt olğanı içün degil qısqa oldı, kommunistler er inceliklerni tafsilâtlı muzakere etmege ister, dep qorqqanları içün.
"İç bir muzakerege sebep olmaycaq bir vesiqa tizmemiz kerek edi, oña birden rey bersinler dep", - hatırlay Levko Lukyanenko.
Ahırı soñu, vesiqa bir qaç kere tüzetilgen soñ, onda dört cümle qaldı. Avgust 24-ünde metinni Yuqarı Radada aşkâr ettiler, aqşam ise Ukraina Mustaqilligi qararnamesini Sofiyskaya meydanından ilân ettiler.
İlân etilgen Ukrainanıñ Mustaqilligini "saqlamaq" içün, parlament muhalefeti Bütünukraina referendumını keçirmege qarar aldı. Milliy hatıra İnstitutınıñ sabıq başı, 1991 senesi ise Yuqarı Rada prezidiumınıñ azası olğan İğor Yuhnovskıy, bu ğayeni ifade etken birinci adam edi.
Onıñ aytqanına köre, o, bu qararnameni referendumsız ileride lâğu ete bilirler, dep emin edi, onıñ içün onı talap ete edi.
"Referendum er şeyden müim edi. Amma, Halq Şurasınıñ bazı azaları bile oña qarşı çıqa edi. Amma men talap ete edim: referendum mıtlaq keçirilmeli", - qoştı Yuhnovskıy.
Dekabrniñ 1-inde Bütünukraina referendumında, iştirakçilerniñ 90%-ından çoqu Mustaqillik Qararnamesine qol tuttı.
Avgustnıñ 23-ünde Ukrainada Devlet bayrağı Kününi qutladılar. Cuma künü Kyivde Sofiyskaya meydanında Ukraina prezidenti, Ukraina bayrağınıñ tantanalı köterilmesi merasiminde iştirak etti.