Лениногорскида яңа йорттан фатир ачкычлары тапшырдылар
(Лениногорск, 24 ноябрь, «Татар-информ», «Заман сулышы», Розалия Мостафина). Бүген Лениногорск шәһәренең 7нче микрорайонында 108 фатирлы социаль ипотека программасы буенча яңа йорт кулланылышка тапшырылды, Бу турыда район газетасы хәбәр итә.
<~>7нче микрорайон яшь гаиләләр, нефтьчеләр районы ул. Яңа йортлар бу тирәдә шактый. Яңа тапшырылган тугыз катлы яңа йортта «Татнефть» компаниясе «Лениногорскнефть» идарәсенең 41 хезмәткәре яшәячәк.
<~>Фатир алучыларны шатлыклы, көтеп алынган вакыйга белән Лениногорск районы башкарма комитет җитәкчесе Зөлфия Михайлова, «Лениногорскнефть» идарәсе начальнигы Рафаил Нурмөхәммәтов котлады. Алар социаль ипотека программасына зур өмет баглауларын, гаиләләр өчен зур ярдәм икәнен әйттеләр.
<~>Ачкычлар тапшыру тантанасына яңа фатир алучылар, аларның шатлыгын бүлешергә дуслары, туганнары, якыннары килгән иде. Фатир ачкычларын кулларына алып, кызыл тасма киселгәннән соң, барысы да тизрәк эчкә үтеп, фатирларны күрергә ашыкты.
<~>Сантехника, газ плитәсе, янгын сигнализациясе датчиклары, су, газ, электр исәпләгечләр урнаштырылган, ике контурлы җылыту котелы куелган.
<~>