Казан һәм Санкт-Петербург китапханәләре хезмәттәшлек турында килеште
(Казан, 30 ноябрь, «Татар-информ»). Санкт-Петербургның «Калинин районы үзәкләштерелгән китапханәләр системасы» дәүләт бюджет мәдәният учреждениесенең 1нче китапханә-филиалы һәм «Казан шәһәренең үзәкләштерелгән китапханәләр системасы» муниципаль бюджет мәдәният учреждениесе арасында хезмәттәшлек турында килешү имзаланды. Бу хакта Татарстан Республикасының Санкт-Петербург шәһәре һәм Ленинград өлкәсендәге Даими вәкиллеге матбугат хезмәте хәбәр итә.
Килешүне Санкт-Петербургның «Калинин районы үзәкләштерелгән китапханәләр системасы» дәүләт бюджет мәдәният учреждениесе директоры Светлана Крылова һәм «Казан шәһәренең үзәкләштерелгән китапханәләр системасы» муниципаль бюджет мәдәният учреждениесе директоры Резеда Исмәгыйлева имзалады. Әлеге инициатива белән Татарстан Республикасының Санкт-Петербург шәһәре һәм Ленинград өлкәсендәге Даими вәкиллеге чыкты.
Кичә, унынчы Милли мәдәниятләр фестивален ябу кысаларында, Татарстан Республикасының Санкт-Петербург шәһәре һәм Ленинград өлкәсендәге Даими вәкиле Ренат Вәлиуллин «Казан шәһәренең үзәкләштерелгән китапханәләр системасы» муниципаль бюджет мәдәният учреждениесе директоры Резеда Исмәгыйлева белән очрашты.
Әлеге килешү ике төбәк арасында хезмәттәшлекне үстерү, мәдәниятне, тарихи кыйммәтләрне ныгыту, үзара тәҗрибә уртаклашу өчен нигез булачак.
Татарстанның Санкт-Петербург шәһәре һәм Ленинград өлкәсендәге Даими вәкиллеге һәм Санкт-Петербургның Калинин районы Үзәкләштерелгән китапханәләр системасын күптәнге дусларча, нәтиҗәле хезмәттәшлек бәйли.
Татар рәссамы Рәшит Моратов күргәзмәсе, «Татар халкының җаны» татар милли киеме һәм көнкүреш әйберләре күргәзмәсе, «Татар халкының зирәк сүзе» китап күргәзмәсе, рәссам Илдус Вахитовның мастер-класслары, татар теле турында лекцияләр үткәрелде, «Акчарлак» фольклор ансамбле чыгыш ясады. Санкт-Петербург шәһәре һәм Ленинград өлкәсе мәктәп укучылары катнашында «Җәлил укулары» II Халыкара әдәби бәйгесенең сайлап алу туры узды.