«Даруль-ифта» мөселман сall-үзәге ярты ел эчендә биш меңгә якын мөрәҗәгать кабул итте
(Казан, 24 декабрь, "Татар-информ"). Татарстан Республикасы мөселманнары Диния нәзарәтендә Рамазан аеның беренче көнендә рәсми рәвештә эшли башлаган һәм хәзерге вакытта да үз эшен дәвам итүче «Даруль-ифта» сall-үзәге әлеге хезмәтнең халык арасында зур ихтыяҗга ия булуын күрсәтте. Тулы булмаган 8 ай эчендә нәзарәтнең шәригать белгечләре сall-үзәк аша Россиянең төрле почмакларыннан 5000гә якын мөрәҗәгать кабул итте. Бу хакта нәзарәтнең матбугат хезмәте хәбәр итә.
Республика мөфтиятенең «Даруль-ифта» сall-үзәге илдә шалтыратулар эшкәртү буенча бушлай федераль номерлы бердәнбер мөселман үзәге булып кала бирә. Белгечләр бер айга уртача 650 шалтыратуга җавап бирергә өлгерә, бу исә бер көнгә якынча 30 мөрәҗәгатьне карау дигән сүз.
Күп каналлы телефон линиясенә кабул ителгән мөрәҗәгатьләр статистикасына караганда, сорауларның күпчелеге дини характерга ия. Әйтик, Рамазан аенда мөселманнарны ураза тоту, фитыр, фидия сәдакаларын, зәкят түләүгә бәйле сораулар кызыксындырса, бүгенге көндә халык өчен намаз, никах һәм талак мәсьәләләре, исламда ир-атның һәм хатын-кызның бурыч-вазифалары, ипотека һәм рассрочка, кредит картасына кагылышлы сораулар, Кыямәт көне, гаурәтне каплау, риэлтор эшчәнлегенең рөхсәт ителү-ителмәве, теге яки бу дини йоланы башкару тәртибе һәм башка бик күп шәригать мәсьәләләре актуаль булып тора.
Моннан тыш, ТР мөселманнары Диния нәзарәтенең «Даруль-ифта» федераль мөселман колл-үзәгегенә киң җәмәгатьчелек белешмә-мәгълүмат алу өчен дә мөрәҗәгать итә. Шунысы игътибарга лаек: барлык мөрәҗәгатьләрнең 60 проценты ир-атларга туры килә. Телефон консультациясенең уртача озынлыгы 2-3 минутны тәшкил итә.
- «Даруль-ифта» – шәригатьнең теге яки бу мәсьәләләре буенча фәтвалар чыгару өчен ТР МДН тарафыннан махсус булдырылган күпканаллы call-үзәк. Теләге булган һәркем эш көннәрендә сәгать 10.00нан 16.00га кадәр 8 800 222 7667 номерына шалтыратып, үзен борчыган сорауларга җавап алырга мөмкин.