Татарстанда 1926 елдан башлап электрон гаилә шәҗәрәсе елъязмасы төзелә
(Казан, 16 гыйнвар, «Татар-информ», Наталья Рыбакова). Гражданлык хәле актларын теркәүнең бердәм дәүләт реестрын Татарстан ЗАГС идарәсе хезмәткәрләре формалаштыра. Узган ел 4,4 млн, ягъни планның 102 процентында акт язмасы цифрлаштырылган. Бу хакта бүген Татарстан Республикасы Министрлар Кабинетының ЗАГС идарәсе башлыгы Гөлшат Нигъмәтуллина ведомствоның йомгаклау коллегиясендә хәбәр итте.
«Ил масштабында барлык акт язмаларын, 1926 елдан башлап, электрон рәвешкә күчерү гамәлгә ашырыла. Бүгенге көндә идарә хезмәткәрләре тарафыннан 9,3 млн акт язмасы цифрлаштырылган, шул исәптән 4,4 млн — 2019 елда, ягъни расланган план нормативының 102 проценты. Ел ахырына кадәр 11 млн акт язмасын тапшырырга кирәк», - диде ул.
Гражданлык хәле актларын теркәү язмаларының Бердәм дәүләт реестрына мәгълүмат тапшыру белән бәйле мөһим гомумдәүләт бурычын хәл итү яңа уникаль мәгълүмат ресурсын формалаштырырга мөмкинлек бирәчәк, диде Нигъмәтуллина. Бердәм дәүләт реестры илнең һәр кешесен билгеләргә мөмкинлек бирәчәк һәм киләчәк буыннар өчен электрон гаилә шәҗәрәсе елъязмасы булып хезмәт итәчәк.