Лаеш янында һәлакәткә очраган вертолетта зыян күрүчеләрне хастаханәгә китергәннәр
(Казан, 7 февраль, «Татар-информ»). Бүген Татарстанда Лаеш янында һәлакәткә очраган вертолетта зыян күргән ике кешене хастаханәгә китергәннәр. Бу турыда ТР Сәламәтлек саклау министрлыгы матбугат хезмәте хәбәр итә.
Ир-атлар авыр хәлдә Республика клиник хастаханәсенә һәм Лаеш үзәк район хастаханәсенә китерелгән.
«Икесе дә авыр хәлдә. Нык туңган кешенең хәле тотрыклангач, аны да Республика клиник хастаханәсенә күчерәчәкләр. Хәзерге вакытта зыян күрүчеләргә Республика Катастрофалар медицинасы үзәге, РКБ, Лаеш үзәк район хастаханәсе бригадалары көче белән бөтен кирәкле медицина ярдәме күрсәтелә», — диелә ведомство хәбәрендә.
Хәзерге вазгыять ТР сәламәтлек саклау министры Марат Садыйковның шәхси контролендә булуын да әйттеләр.
«Татар-информ» мәгълүмат агентлыгы хәбәр иткәнчә, Татарстанда вертолет һәлакәте нәтиҗәсендә ике кеше имгәнгән, берсе һәлак булган.