Татарстан халыклары ассамблеясы составына Казан поляклары оешмасы кертелде
(Казан, 12 февраль, «Татар-информ», Наталья Рыбакова). Казан поляклары оешмасы ТР халыклары ассамблеясы составына керде. Бүген Казанда Татарстан халыклары ассамблеясы советының 2019 елгы эш нәтиҗәләре буенча утырышында шундый карар кабул ителде. Утырыш Татарстан халыклары Дуслыгы йортында ТР Дәүләт Советы Рәисе Фәрит Мөхәммәтшин катнашында узды.
«Безгә „Казан шәһәре полюсы“ җирле иҗтимагый оешмасы төзелүгә бәйле рәвештә ТР халыклары ассамблеясы составындагы яңа әгъзаны раслау мәсьәләсен карарга кирәк. Оешма ТР Юстиция министрлыгында рәсми рәвештә теркәлгән һәм ТР халыклары ассамблеясы составына керергә кабат теләк белдерә», — диде утырышта Фәрит Мөхәммәтшин.
Залда утыручы оешма җитәкчесе Владислав Фелимонов хәбәр иткәнчә, Татарстан башкаласында 800гә якын поляк яши. Казан полякларының иҗтимагый оешмасы составына 29 кеше керә, шуларның 18е тел өйрәнү курсларына йөри.
«Бөек Җиңүнең 75 еллыгы елында Польша дәүләте белән тагын да тыгызрак элемтәләр урнаштыру теләге белән һәм Европа дәүләтләрен фашизмыннан чистарту өчен көрәштә һәлак булган ватандашларыбызның күп булуын исәпкә алып, без бүген ТР Халыклары ассамблеясы советы составына Казан поляклары оешмасын кертү турында карар кабул итәбез. Татарстанда яшәүче поляклар туган җирләреннән ким булмасын өчен, без бергәләп күп кенә игелекле эшләр башкарачакбыз», — диде Фәрит Мөхәммәтшин.
ТР Дәүләт Советы спикеры Татарстан Халыклар ассамблеясы советы вәкилләренә бергәләп нәтиҗәле эш башкаруны теләде.
- Татарстан халыклары ассамблеясы составына 200дән артык милли иҗтимагый берләшмә керә.