Мөхәммәтшин: Путин Россия Президенты вәкаләтләрен ике срок белән чикләргә ризалашты
(Казан, 4 март, «Татар-информ», Наталья Рыбакова). РФ Конституциясенә төзәтмәләр кабул ителгән очракта, Президент рәттән ике сроктан артык вазифасында була алмый. Моннан тыш, дәүләт башлыгы вазифасына кандидат Россия Федерациясе территориясендә кимендә 25 ел яшәргә тиеш була. Бу хакта бүген ТР Дәүләт Советы Рәисе, «Бердәм Россия» Бөтенроссия сәяси партиясенең Татарстан төбәк бүлеге секретаре Фәрит Мөхәммәтшин Казанда ТР Профсоюзлар федерациясе вәкилләре белән очрашуда әйтте.
«Президентлыкка кандидат безнең илдә кимендә 25 ел яшәргә тиеш һәм аның башка дәүләтләрдә гражданлык һәм яшәргә рөхсәте булмаска тиешлеге турында төзәтмә тәкъдим ителә. Бер кешенең Президент вазифасында ике сроктан артык ала була алмаячак. Безнең оппозиция шуңа басым ясады, һәм Владимир Владимирович Путин моның белән килеште», — диде спикер.
Фәрит Мөхәммәтшин искә төшергәнчә, РФ Президенты тарафыннан эшче төркем оештырылды, ул халык бердәмлеген һәм җәмгыятьне берләштергәндә илебезнең алга таба үсешенә ярдәм итү юлларын эзли. ТР Дәүләт Советы спикеры әлеге төркем составына керә һәм Мәскәүдә РФ Конституциясенә төзәтмәләр кертүдә даими катнаша. Татарстанда очрашуларда ул даими рәвештә республика халкына нинди төзәтмәләр турында фикер алышулары хакында сөйли.
«Федераль парламентарийлар, министрлар, судьялар, Президент, Премьер-министрның чит ил гражданлыгы яки башка дәүләт территориясендә даими яшәргә мөмкинлек бирә торган башка документы була алмавы хупланды. Безнең Россиядә ике, өч гражданлыгы булган гражданнар күп. Россия эчке патриотлыгы, бер ил генә кешесе булу РФ Конституциясендә теркәлүен теләр идем. Монда аерым укулар булмады», — диде ТР Дәүләт Советы Рәисе.