Рөстәм Миңнеханов: Димчеләр элек зур бурыч башкарган
(Казан, 6 март, «Татар-информ», Рузилә Мөхәммәтова). Татарстан Президенты Рөстәм Миңнеханов яңа гаиләләр кору өчен яучылар кирәклеген әйтте. Бу хактагы фикерләрен ул 8 март уңаеннан журналист хатын-кызлар белән традицион очрашуда җиткерде.
«Хәзер бик күп кызлар һәм егетләр үзләренә пар таба алмый. Бергә укыганда яшьләргә аралашу җиңелрәк. Ә мөстәкыйль яши башлагач, башта кирәк түгел диләр, ә аннары инде соң була. Бу зур проблема», — диде Президент.
«Кешеләрнең үз парын таба алмау проблемасы аеруча авылларда зур. Без моны ничек хәл итәргә дип гел уйланабыз. Кешеләргә аралашу җитми. Безгә кешеләр аралаша алсын өчен ниндидер формалар уйлап табарга кирәк. Бәлки безгә ниндидер электрон база булдырыргадыр?» — диде ул.
Рөстәм Миңнеханов элек димче әбиләр булганлыгын искә төшерде. «Алар кешеләрне димләп йөриләр иде. Хәзер алар бетеп бара. Ә бит чынлыкта алар зур бурыч башкарганнар. Бәлки, безгә әбиләргә тукталыргадыр?» — дип сорау куйды Президент.
Татарстан Президентының журналист хатын-кызлар белән традицион бәйрәм очрашуы социаль мәсьәләләргә — демография һәм мәктәп туклануы темасыннан башланып ктите. Демография мәсьәләсе ялгызлык проблемасына да барып тоташа.