Казанда туган тел һәм әдәбият укытучыларының бөтенроссия бәйгесенең финалы була
(Казан, 9 март, «Татар-информ»). Татар теле һәм әдәбияты укытучылары арасында «Туган тел» мастер-классы Бөтенроссия бәйгесенең финалы Татарстан башкаласында 30 марттан 1 апрельгә кадәр узачак. Бу турыда Татарстан Мәгариф һәм фән министрлыгы матбугат хезмәте хәбәр итә.
Чара «2014 — 2021 елларда Татарстан Республикасы дәүләт телләрен һәм Татарстан Республикасында башка телләрне саклау, өйрәнү һәм үстерү» дәүләт программасын гамәлгә ашыру кысаларында уздырыла.
Конкурс Россия һәм Татарстан халыкларының тел һәм мәдәни күптөрлелеген саклап калуга һәм үстерүгә ярдәм итү, туган телләр укытучыларының абруен күтәрү, педагогик тәҗрибәне һәм һөнәри осталыкны тарату максатыннан үткәрелә.
Конкурсның читтән торып уздырыла торган этабында республика районнарыннан 79 педагог һәм башка төбәкләрдән ун татар теле һәм әдәбияты укытучысы катнашты. Финалда 50 педагог катнаша.