Татарстан спорт мәктәпләре һәм секцияләрендә дәресләр үткәрелмәячәк
(Казан, 19 март, «Татар-информ»). Татарстан спорт министры Владимир Леонов «Татарстан Республикасы территориясендә яңа коронавирус инфекциясен кисәтү шартларында физкультура-спорт эшчәнлеген оештыру турында»гы боерыкны имзалады.
«19 марттан һәм махсус күрсәтмә бирелгәнчегә кадәр Татарстан Республикасы спорт резервын әзерләүче физкультура-спорт оешмаларына барлык категория гражданнарның әлеге учреждениеләрдә шөгыльләнүен, шул исәптән балалар һәм олылар катнашындагы күнегүләрне һәм секция дәресләрен вакытлыча туктатырга», - диелә 18 мартта имзаланган боерык текстында.
Инде кичә үк Казанның зур спорт объектлары халыкка учреждениеләрнең ябылуы турында хәбәр итә башлады.
Спортның су төрләре сарае Instagram социаль челтәрендәге үз аккаунтында 19 мартка кадәр эшен вакытлыча туктатуы хакында хәбәр итте.