«Татнефть» компаниясе битлекләр тегү өчен волонтерлар чакыра
(Казан, 23 март, «Татар-информ»). Коронавирус пандемиясеннән саклану өчен, «Татнефть» компаниясе волонтерларны бер тапкыр кулланыла торган битлекләр тегәргә җыя. Бу турыда компаниянең матбугат хезмәте хәбәр итә.
«Татнефть» бу эшкә республиканың Әлмәт районы кече бизнес вәкилләрен җәлеп итте. Компания шәһәр ательеларын һәм үзмәшгуль гражданнарны бушлай өлге һәм материал белән тәэмин итте.
Битлекләрне СМС-25 кебек тукылмаган күп катлы полипропилен материалдан тегәчәкләр. Аның тышкы каты спанбонд, ә эчке ягы мельтблаун дип аталган материалдан була.
Битлекләр хастаханәләргә һәм шәһәр халкына биреләчәк.