Коронавирустан вафат булган кинорежиссер Сергей Литовец 6 майда соңгы юлга озатыла
(Казан, 30 апрель, «Татар-информ»). Мәскәүдә коронавирустан вафат булган кинорежиссер һәм кинооператор Сергей Литовец соңгы юлга Королев җеназа йортыннан 6 май көнне озатылачак дип хәбәр итә кинопродюсер Светлана Бохараева.
Казанда туып үскән кинорежиссер Сергей Литовецның вафат булуы бүген билгеле булды. Ул Мәскәү янындагы Пушкино зиратына җирләнәчәк.
Светлана Бохараева әйтүенчә, җеназа эшләрен РФ Кинематографистлар берлеге һәм дуслары үз өстенә ала. Дуслары акча җыю да оештырганнар.
Хәзерге вакытта танылган кинорежиссерның хатыны Татьяна һәм улы Александр Мәскәүнең төрле хастаханәләрендә дәваланалар.
- Сергей Литовец - РФ Кинематографистлар берлеге әгъзасы, Россия кинооператорлар гильдиясе әгъзасы. ВГИК тәмамлаган. Кино һәм телевидениедә 200ләп эш авторы.