Россия Сәламәтлек саклау министры Михаил Мишустинның хәле турында сөйләде
(Казан, 13 май, «Татар-информ»). Яңа Covid-19 коронавирус инфекциясе йоктырган Россия Премьер-министры Михаил Мишустин терелүгә таба бара. Россия Сәламәтлек саклау министрлыгы башлыгы Михаил Мурашко шул турыда сөйләде. Бу хакта ТАСС хәбәр итә.
«Бүген Мишустин видеоселектор киңәшмә үткәрде, ул терелүгә таба бара», — диде сәламәтлек саклау министры, Хөкүмәт Рәисенең хәле турында сөйләгәндә.
«Киләсе атнада ул (Мишустин — Т-и иск.) кабинетында булачак», — дип өстәде Мурашко.
Шул ук вакытта, министр сүзләренә караганда, Премьерга медицина процедуралары кирәк әле, уңай динамика күзәтелә.
Элегрәк «Татар-информ» мәгълүмат агентлыгы Россия Премьер-министры Михаил Мишустинның коронавирус белән авырганлыгын хәбәр иткән иде.