Чиләбе татарлары ТАССРның 100 еллыгына шигъри котлау җибәргән
(Казан, 23 май, «Татар-информ»). Чиләбе өлкәсендә яшәүче шагыйрь Ирек Сабиров котлау сүзләрен шигъри юллар аша җиткерә. Бу турыда Бөтендөнья татар конгрессы матбугат хезмәте хәбәр итте.
Татарстан
Читтә яшәсәм дә, күреп торам
Илемдәге алга китешне:
Минем Ватаным да бүтәннәргә
Үрнәк булып үсеп җитеште.
«Без Ураллар!» — диеп йөз чөереп,
Әллә инде артта калдыммы?
Һәр тарафта — Татарстан әйди,
Һәр өлкәдә Казан алдынгы
Ай-Ти, Иннополис… Һәр өлкәдә
Тик бер Казан шөһрәт казанган.
Ә без Чиләбене эткәлибез,
Калышмасын, диеп, Казаннан…
Уралларга җитә аның нуры,
Себерләргә җитә гайрәте.
Дөнья халыкларын шаккатырып,
Үсә, гөрли Татар дәүләте!