Миңнехановка I кварталда «Татнефть» ятмаларында нефть чыгару турында хәбәр иттеләр
(Казан, 25 май, «Татар-информ»). 2020 елның беренче өч аенда «Татнефть» ятмаларында 7,2 млн тонна нефть чыгарылган, бу узган ел дәрәҗәсеннән түбәнрәк. Нефть продуктлары чыгару күләме 3,1 млн тонна тәшкил иткән. ТР Президенты Рөстәм Миңнеханов рәислегендә «Татнефть» ГАҖ Директорлар советы утырышында шул турыда әйтелде. Бу хакта республика җитәкчесенең матбугат хезмәте хәбәр итә.
Утырышта катнашучылар 2020 елның дүрт аенда «Татнефть» бюджеты үтәлеше турында хисап тыңлады һәм июнь аена бюджетны раслады. Моннан тыш, дебитор һәм кредитор бурычлары турында мәгълүмат китерелде.
«Шулай ук утырышта катнашучылар компаниянең Россиядән читтәге проектлары торышы турында мәгълүмат тыңлады. Нефть һәм сервис компанияләренең «Татнефть» технологияләре һәм җиһазлары белән кызыксынуын исәпкә алып, директорлар советы чит ил партнерлары белән хезмәттәшлекне дәвам итү һәм уртак проектларны алга таба гамәлгә ашыруны планлаштыру турында карар кабул итте», – диделәр матбугат хезмәтендә.
2020 елның апрелендә «ОПЕК+» килешүендә катнаша торган илләр нефть чыгаруны май – июнь айларында тәүлегенә 9,7 млн баррельгә, икенче яртыеллыкта 7,7 млн һәм 2022 елның апрель азагына кадәр 5,8 млн баррельгә кыскарту турында килешкән.