Миңнеханов «Татнефтехиминвест-холдинг» директорлар советы утырышын уздырды
(Казан, 25 август, «Татар-информ», Егор Никитин). Татарстан Президенты Рөстәм Миңнеханов «Татнефтехиминвест-холдинг» директорлар советы утырышын уздырды. Очрашуда аңа киләчәктә республика территориясендә тормышка ашырылырга мөмкин булган берничә инновацион проект тәкъдим иттеләр. Эшлекле утырыш Перспективалы тикшеренүләр фонды вәкиле Александр Панфилов докладыннан башланды. Ул киңәшмәдә катнашучыларга реактор порошогын каты фазалы алу технологиясе һәм молекуляр полиэтиленнан ныклы җепләр эшләү турында сөйләде. «Мондый полиэтилен уникаль үзлекләргә ия. Ныклыгы һәм сыгылмалылыгы буенча ул корыч һәм полимерларның барлык танылган төрләреннән өстенрәк. Аның температурасының эш диапазоны100дән алып +150 градуска кадәр диапазонда урнашкан. Бу аны температура алышыну шартларында эшләгәндә алыштыргысыз итә», - дип аңлатты Панфилов. Рөстәм Миңнеханов очрашуда катнашучыларга мондый инновацион полиэтиленның киң производствосын булдыру мөмкинлеген карарга кушты. «Хәзерге вакытта материал өлкәсендә революция бара –композит производстволарының тулы бер комплекслары төзелә. Бу материаллардан агрессив мохиттә эшләүче күп кенә детальләрне булдырырга мөмкин», - диде ТР Президенты