Миңнехановка «Татнефть» бюджеты үтәлешенең җиде айлык нәтиҗәсе турында хәбәр иттеләр
(Казан, 25 август, «Татар-информ»). Бүген Татарстан Республикасы Президенты Рөстәм Миңнеханов В.Д. Шашин исемендәге «Татнефть» ГАҖ Директорлар советы утырышын уздырды. Бу хакта ТР Президенты матбугат хезмәте хәбәр итә.
«Утырышта 2020 елның җиде аенда компания бюджеты үтәлеше нәтиҗәләре каралды, агымдагы елның сентябренә бюджет расланды», — диелә хәбәрдә. Компания эшчәнлеге беренче яртыеллыкта ОПЕК+ килешүе кысаларында нефть чыгаруны чикләү, коронавирус пандемиясе аркасында нефть һәм нефть продуктларына бәяләрне киметү шартларында алып барылды.
Беренче яртыеллыкта «Татнефть» 13,3 млн тонна нефть чыгарган, углеводород газын исәпкә алып, нефть продуктлары чыгару 29 процентка — 6,2 млн тоннага кадәр арткан. Ваклап сату челтәре аша нефть продуктларын сату күләме 22 процентка -2,4 млн тоннага кадәр арткан. 5 млн данә шина продукциясе чыгарылган, бу 2019 елның шул ук чоры белән чагыштырганда 20процентка артык.Төркем буенча күчерелгән салымнарның гомуми суммасы 171 млрд сум тәшкил итте.
Директорлар советы «Татнефть» төркеменең ОПЕК+ белән килешү буенча квоталарны үтәү кысаларында углеводород чималын чыгаруны киметү чаралары турындагы мәгълүматны тыңлады. 2020 елда компаниядә нефть чыгару 25,9 млн тонна күләмендә фаразлана.
2021-2023 елларга «Разведка һәм чыгару» бизнес-блогының финанс-хуҗалык эшчәнлеге фаразын формалаштыру өчен директорлар Советы база сценариен кабул итте, аның концепциясе чыгарыла торган нефтьнең максималь маржинальлеген тәэмин итүне, тукталган скважиналар фондын баланслы эшләтеп җибәрүне, 2021 елның икенче яртысында геологик-техник чаралар программасын киңәйтүне күздә тота.
Директорлар советында шулай ук генераль директор урынбасары - баш геолог Рәис Хисамовка бүләкләр тапшырылды. Рәис Салих улы «Дуслык» ордены белән бүләкләнде, шулай ук «В.Д. Шашин исемендәге «Татнефть» ГАҖ каршындагы казанышлары өчен» мактау билгесе белән бүләкләнде.