Фәрит Гыйбатдинов эшен дәвам итеп «Урмай зәлидә» фестиваленең гала-концерты үтте
(Казан, 31 октябрь, «Татар-информ», Рузилә Мөхәммәтова). «Урмай зәлидә» төрки дөнья милли сәнгать фестивале концерты беренче мәртәбә Чувашия татарларының милли лидеры Фәрит Гыйбатдиновтан башка үтте. Бу хакта Чувашия татарлары милли-мәдәни үзәге рәисе Хайдәр Сафиуллин хәбәр итә.
«Урмай зәлидә - 2020» сәнгать фестиваленең Гала-концерты Урмай мәдәният йортында үткәрелгән. Ел саен үтә торган татар мәдәнияте, музыка, шигърият, бию бәйрәме быел ТАССР һәм ЧАССР оешуның 100 еллыгына, шулай ук “Чувашия Республикасы татарларының милли-мәдәни автономиясе" оешмасына нигез салучы Фәрит Гыйбатдинов истәлегенә багышланган.
“Фестивальнең инициаторы һәм аны оештыручы Фәрит Гыйбатдинов үзенең музыкаль-мәдәни идеясен кыю рәвештә үстерде, Россия төбәкләреннән яңа иҗади коллективларны эзләде; ачык аутентик һәм фольклор ансамбльләрне чакырды. Алга таба да аның эшен дәвам иттерү безнең изге бурыч”, - ди оештыручылар.
Гала-концертның тантаналы өлешендә котлау сүзләре белән Комсомол районы администрациясенең мәдәният һәм архив эшләре секторы мөдире Екатерина Конторская, Чувашия татарлары милли-мәдәни үзәге рәисе Хайдәр Сафиуллин чыгыш ясаган. Чувашия Республикасы Мәдәният, милләт эшләре һәм архив эше министры вазифаларын башкаручы Светлана Каликова, Бөтендөнья татар конгрессы Башкарма комитеты җитәкчесе Данис Шакиров видео котлау, Татар федераль милли-мәдәни автономиясе Советы рәисе Илдар Гыйлметдинов котлау юллаган.
Быел "Урмай зәлидә" конкурсы дистанцион рәвештә 1 февральдә башланып 30 майга кадәр дәвам итте. Конкурста Россиянең 24 регионыннан 80 иҗади коллектив, 150 аерым башкаручы катнашкан. Болар - Башкортстан, Кабардино-Балкария, Марий Эл, Төньяк Осетия, Татарстан, Чувашия, Якутия, Түбән Новгород һәм Ульяновск өлкәләре, Курган шәһәре.
Бәйрәмне оештыручылар - Чувашия Республикасы татарларының милли-мәдәни автономиясе, Чувашия Мәдәният министрлыгы, Бөтендөнья татар конгрессы Башкарма комитеты, Россия Федерациясе татарларының Федераль милли-мәдәни автономиясе.