Әлки районы сәхнәсендә төрле милләт вәкилләре очрашты
(Әлки, 5 ноябрь, «Татар-информ», « Әлки хәбәрләре »). Бүген, 5 ноябрьдә, район мәдәният йортында яшьләр өчен Татарстан Конституциясе көненә багышланган эчтәлекле һәм күңелле чара булды. Бу турыда район басмасы хәбәр итә Сәхнәдә Татарстан халыкларының яшьләр ассамблеясы тарафыннан әзерләнгән театрләштерелгән күренеш булды. Анда республикабызда төрле милләт кешеләренең дус-тату яшәве сәхнә осталары тарафыннан үтемле һәм матур итеп күрсәтелде. Чарада һәр милләт халкының гореф-гадәтләре, йолалары, традицияләре бәян ителде. Залда әлеге чараны тамаша кылучы яшьләр дә бу темага кушылдылар, сораулар, тәкъдимнәр юллап, кызыклы фикерләре белән уртаклаштылар. Аннан соң ассамблеяның Әлки вәкиллеге оештырылды. Аның җитәкчесе итеп Базарлы Матак урта мәктәбе укучысы Делина Гыйзетдинова сайланды.