Чирмешән районыныда Яңа елга иң яхшы бизәлгән территория һәм мәйданчыклар билгеләнә
(Чирмешән, 2 декабрь, «Татар-информ», « Безнең Чирмешән », Кадрия Гамирова). Чирмешән районында «Яңа елга иң яхшы бизәлгән территория һәм мәйданчык» бәйгесенә старт бирелде, ул 25 ноябрьдән 10 декабрьгә кадәр дәвам итә. Аңа 2020 елның 20 декабреннән дә соңга калмыйча йомгак ясалачак. Бу хакта район газетасы яза. Җиңүчеләр «Авыл җирлекләре арасында Яңа ел бәйрәменә иң яхшы бизәлгән мәйданчык»; «Район үзәгендәге оешмалар арасында Яңа ел бәйрәменә иң матур бизәлгән мәйданчык» номинацияләрендә бүләкләнәчәк. Иң элек Яңа ел мәйданчыкларының оригинальлегенә, яңалыкка, ут белән бизәлешкә һәм сәнгати якын килү дәрәҗәсенә, кар сыннар, боз шәһәрчекләре булу-булмауга һәм башкаларга игътибар биреләчәк. Җиңүчеләргә район башкарма комитетының Рәхмәт хатлары һәм кыйммәтле бүләкләр тапшырылачак.