Белгеч коронавирус инфекциясен кабат йоктыру шартын атады
(Казан, 20 декабрь, «Татар-информ»). Иммунитетка бәйле проблемалары булган очракта, кешенең коронавирус инфекциясен кабат йоктыруы мөмкин. Пастер исемендәге Санкт-Петербург эпидемиология һәм микробиология фәнни-тикшеренү институты директоры, Россия Фәннәр академиясе академигы Арег Тотолян «Звезда» телеканалына шулай дип белдерде. Бу хакта РИА Новости агентлыгы хәбәр итә.
Аның сүзләренчә, кешенең коронавирусны яңадан йоктыруына карата аның ныклы ышанычы юк, әмма теоретик яктан бу мөмкин хәл.
«Билгеле бер категориягә кергән затлар һәрвакыт бар, аларда бер тапкыр авырганнан соң яки үткәрелгән вакцинация нәтиҗәсендә иммунитет барлыкка килмәскә мөмкин. Әлеге кешеләрнең иммун системасында кимчелекләр ачыктан-ачык күренеп тора яки күренми, моны икенче төрле иммунодефицит халәт дип әйтергә мөмкин», — диде ул.
Тотолян билгеләп үткәнчә, тестларның нәтиҗәсе ялгыш та булырга мөмкин, лаборатор хаталар да күзәтелә, шунлыктан тагын да җентекле тикшеренү узарга кирәк.
Россия Кулланучы хокукларын яклау һәм кеше иминлеге өлкәсендә күзәтчелек федераль хезмәте (Роспотребнадзор) башлыгы Анна Попова элегрәк Россиядә коронавирус инфекциясен кабат йоктыру очраклары сирәк кенә теркәлүен, һәр очракны махсус эшче төркем каравы хакында хәбәр иткән иде.