Чирмешән районында бәкедә су коенучы иң өлкән кешегә 82 яшь
(Чирмешән, 12 гыйнвар, «Татар-информ», «Безнең Чирмешән» , Кадрия Гамирова). Бәкедә су коенучылар — моржлар быел да Әккәрәйдә җыелды. Биредә Моржлар бәйрәме дүртенче тапкыр оештырылды. Әккәрәй моржларының иң олысы — Раиса Кваковага быел 82 яшь була. Әнисе Лариса белән бәкегә чумган Маша Торфимовага әле 5 яшь кенә. Бу турыда район басмасы хәбәр итә.
Быел да фестивальдә тирә-күрше авыллардан гына түгел, күрше Яңа Чишмә, Әлмәт районнарыннан да кунаклар бар иде. Әлмәт шәһәренең «Айсберг» моржлар клубы әгъзалары килү бәйрәмне тагын да кызыклы, дәрәҗәле итте. Алар бу көнне суга чумган һәр кешенең муенына махсус медальләр тактылар.
Кече Сөлчә елгасында бәке кисүдә, анда төшү-менү юллары ясауда, кыскасы, кунакларга шартлар тудыруда Валерий Наратов, Михаил, Сергей, Даниил Кваковлар, Александр, Владимир, Алексей Чалиннарның өлеше зур. Ә Николай Петров бәйрәм кәефе тудыру өчен кар сыннары ясаган.
Гадәти булмаган чарага Кыш бабай һәм Кар кызы белән бергә әкият персонажлары — Нептун, Русалка һәм «бакалар» да килгән. Үзешчән сәнгатьтә катнашучыларның чыгышлары да бәйрәм кунакларының кәефен күтәрде.
«Яр буенда ук, моржларга киенү-чишенү өчен җылы вагоныбыз бар. Быел Җәлил Мөхәммәтшин ярдәме белән җылы автобус та торды. Гомумән, чараны оештыруда булышкан һәр кешегә, аеруча Ивашкино авыл җирлеге башлыгы Николай Емельяновка зур рәхмәт», — ди Әккәрәй мәдәният йорты директоры Лидия Квакова.
Илле литрлы казанда елга балыгыннан әзерләнгән ухадан һәркем авыз итте. Кунакларны учакта кайнаган судан үлән чәе һәм кайнар коймак белән дә сыйладылар.