Башкортстанда Урал аръягы башкортларының мәдәниятенә багышланган форум булачак
(Казан, 8 май, «Татар-информ»). 19 майдан 21 майга кадәр Башкортстанның Әбҗәлил районында Урал аръягы башкортларының «Комарткы» дип аталган яшьләр форумы узачак.
Форум эше шәҗәрә һәм халык иҗаты жанрларын, шул исәптән халык һәм йола уеннарын, декоратив-гамәли сәнгатьне һәм һөнәрчелекне популярлаштыруга һәм саклап калуга юнәлтелгән. Бу турыда «Башинформ» хәбәр итә.
Форум кысаларында гаиләләр арасында «Быуын сылбыры» видео-конкурсы, халык иҗаты жанрлары буенча остаханәләр, «Урал аръягы башкортлары» фәнни-гамәли конференция, декоратив-гамәли сәнгать күргәзмәсе планлаштырыла.
Чара «Россия милләтенең бердәмлеген ныгыту һәм Башкортостанда халыкларның этномәдәни үсеше» дәүләт программасын гамәлгә ашыру максатларында һәм «Шәҗәрә» бөтенроссия мәдәни-агарту проекты кысаларында узачак.