Татарстан Журналистлар берлегендә Рамил Галинең шәхси фотокүргәзмәсе ачылды
(Казан, 3 июнь, «Татар-информ», Марат Ишкильдин). Татарстан Журналистлар берлегендә «Татар-информ» мәгълүмат агентлыгы фотографы Рамил Галинең шәхси күргәзмәсе ачылды. «Күргәзмә өчен фоторәсемнәрне мин „Татар-информ“ мәгълүмат агентлыгы йөкләмәсе буенча 1,5 ел дәвамында, март аенда пандемиянең беренче көннәреннән башлап һәм вакцинация уздыру көннәренә кадәр төшердем», — диде Рамил Гали.
Күргәзмә «Татарстанда пандемия фототарихы» дип атала. Экспозиция фотосурәтләренең бер өлеше хастаханәләрнең «кызыл» зонасында эшләнгән, анда табиблар Covid-19 йоктырган пациентлар гомере өчен көрәшә, икенче өлеше шәһәрдә үзизоляция һәм Казанны хәрбиләр чолгап алган вакытта төшерелгән. Экспозициядә шулай ук Татарстан волонтерларына багышланган эшләр дә тәкъдим ителгән, алар Казанда яшәүчеләргә һәм гражданнарны вакцинацияләүче табибларга азык-төлек җыелмаларын тараткан. «Тарих әле тәмамланмаган, чөнки коронавирус әле җиңелмәгән. Бәлки коллекция тулыланыр», — диде фоторәссам. Күргәзмә шул исәптән «Бәллүр каләм» журналист премиясенә дә әзерләнгән, быел аның номинантларының берсе Рамил Гали булды.
«Күргәзмә темасы актуаль һәм фотографияләр дә бик әйбәт. Рамил Гали биредә үзенең өченче күргәзмәсен оештыра, аның һәр күргәзмәсе безнең өчен якты нур булып балкый, — дип уртаклашты Татарстан Рәссамнар берлеге башкарма директоры Ралия Фәтхетдинова. Күргәзмәдә республикадагы пандемиягә каршы көрәш тарихының төрле этапларыннан 26 фотосурәт тәкъдим ителгән. Күргәзмәдә депутат, «Яңа гасыр» телерадиокомпаниясе генераль директоры Илшат Әминов булды һәм фотографны күргәзмәсе ачылу белән котлады.