Рөстәм Миңнеханов Путинга М12 трассасын төзү барышы турында сөйләде
(Казан, 8 июль, «Татар-информ»). Мәскәү — Казан — Екатеринбург М12түләүле тиз йөрешле автотрассасын өлешчә 2022 елда ачу күздә тотыла. Бу хакта Мәскәү Үзәк боҗра автомобиль юлы йомгаклау участогын ачу вакытында узган магистраль төзелеше киңәшмәсендә әйтелде.
Киңәшмәне Россия Президенты Владимир Путин үткәрде, М12 проектын РФ вице-премьеры Марат Хөснуллин тәкъдим итте. Фикер алышуда Татарстан Республикасы Президенты Рөстәм Миңнеханов һәм территорияләреннән трасса узачак Россия башка төбәк җитәкчеләре катнашты.
«Хөрмәтле Владимир Владимирович, < ... > бу проект өчен рәхмәт белдерәсем килә. М12 юлы республика буенча тулы куәтенә төзелә, бездә ул 142 километр, 7нче һәм 8нче участок. Бөтен трасса буенча эш тулысынча бара, шул исәптән Идел аша күпер буенча да. Бернинди сораулар да юк. Атна саен без очрашабыз, барлык мәсьәләләрне дә хәл итәбез», —дип хәбәр итте ул.
«Марат Шакирҗан улы [Хөснуллин] билгеләгән Чаллы һәм Түбән Кама шәһәрләрен әйләнеп чыга торган икенче өлеш бар. Бу М7, чөнки бүген плотина аша йөрибез. Шулай ук трассировка да эшләнгән, документлар экспертиза уза. Иртәгә үзем барам, бөтен эшне карыйм. Һәм Сез билгеләгән срокларда башкарып чыгуда бернинди шик тә юк: без бу вакытта эшне башкарырга тиеш», - дип өстәде ТР Президенты.
«Бөтен ил өчен бик мөһим проект, һәм Марат Шакирҗан улының тарихи ватанына, Казанга кадәр юлны төгәл җиткерәчәгенә шикләнмим, шулаймы?» - дип, Путин риторик сорау бирде. Шул ук вакытта ул Төмәнгә, аннары Чиләбегә кадәр юлны төзеп, боҗраны тоташтырырга тәкъдим итте.