Буада «Иманлы кыз» җәйге сәламәтләндерү чарасы оештырылды
(Казан, 16 июль, «Татар-информ»). Буа шәһәренең «Әбү Хәнифә» мәчетендә мәктәп яшендәге балалар өчен «Иманлы кыз» дип исемләнгән җәйге сәламәтләндерү чарасы оештырылды. Ул 5 июльдән 11 июльгә кадәр дәвам итте. Иртәнге сәгать 8.30дан 13.30гә кадәр кызлар ял итү белән беррәттән дини гыйлем алдылар. Көндә төрле темага вәгазь тыңладылар. Пәйгамбәрләрнең тарихы белән таныштылар. Дини белемнәренә карап, төркемнәргә бүленеп, кайсы хәреф өйрәнде, кайсы аларны тоташтырып укыды, Коръәнне укучылар һәм күңелдән тапшыручылар да булды, дип хәбәр итә ТР Диния нәзарәте. Ислам дине кануннары буенча пакьләнергә дә өйрәнделәр: тәһарәт, госелне үзләштерделәр. Атна ахырында узган темалар буенча викторина оештырылды. Һәр балага сорау бирелде, бүләкләр тапшырылды. Шулай ук иң тырыш шәкертләр дә үз төркем мөгаллимәсе белән билгеләп үтелде. Татлы күчтәнәчләр тапшырылды. Ике мәртәбә кайнар ризык белән туклану оештырылды. Иртән чәй белән кайнар камыр ризыгы булса, өйләдә аш яки берәр икенче ризык әзерләнде. Чара ахырында кызларга намазлыклар бүләк ителде.