Россия командасы Токиода Олимпиадада бишенче урын алган
(Казан, 8 август, «Татар-информ»). Россия җыелма командасы якшәмбе көнне Токиода тәмамлана торган Олимпия уеннарының гомуми медаль зачетында бишенче урынны алды.
Россия спортчылары барлыгы 20 алтын, 27 көмеш һәм 23 бронза медаль алган. Шул ук вакытта Россиянең гандбол буенча хатын-кызлар җыелма командасы хәзерге вакытта финалда уйный. Шулай итеп, россиялеләр активында көмеш яки алтын медаль булачак. Әмма команда позицияләрендә нәтиҗә чагылмаячак. Бу турыда РИА Новости хәбәр итә.
Медаль зачетын лидерлык итүче Кытайдан озак вакыт артта калган һәм Олимпиаданың йомгаклау көнендә лидерлыкка чыккан АКШ җыелмасы отты. Америкалылар исәбендә 39 алтын, 40 көмеш һәм 33 бронза медаль. Икенче урынны Кытай алды (38-32-18). Өченчеләре — Олимпиада хуҗалары японнар (27-14-17). Бөекбритания җыелма командасы дүртенче урынга (22-21-22) чыкты.
Медальләрнең гомуми саны буенча 71 бүләк алган россиялеләр бары тик АКШ (112) һәм Кытайдан гына калыша (88).
Россия олимпиячеләре спорт гимнастикасы, синхрон йөзү, җиңел атлетика, бокс, фехтовкалау, пуля ату, йөзү, тхэквондо, теннис, көрәш, баскетбол 3×3, җәядән ату, пляж волейболы, академик ишү, нәфис гимнастика, волейбол, суга сикерү, велотрек, дзюдо һәм гандбол буенча бүләкләр алды.