Урта һөнәри белем бирү йортлары җитәкчеләре укучылар дәрес калдырган өчен җәза алачак
(Казан, 20 август, «Татар-информ»). Профессиональ белем бирү оешмалары студентларын укырга йөрү буенча тиешле контроль булмаган очракта аларның җитәкчеләре җәза алачак. Бу хакта Татарстан Президенты Рөстәм Миңнеханов Актанышта мәгариф хезмәткәрләренең август киңәшмәсендә әйтте. ТР Президенты сүзләренчә, урта һөнәри белем бирү системасы өчен дисциплина мәсьәләсе мөһим булып кала. Ул һөнәри белем бирү оешмалары эшчәнлегенә мониторинг ясалуын әйтте. Нәтиҗәдә, укучыларның дәрескә йөрмәүләре яки җитди сәбәпләрсез даими дәрес калдыру очраклары ачыкланды. «Гомумән тәртипсезлек. Болай эшләргә ярамый. Бу алдау, ялган мәгълүмат бирү. Җиде җитәкче студентларның укырга йөрүен тиешле контрольдә тотмаган өчен дисциплинар җаваплылыкка тартылды, өч җитәкче эштән чыгарылды. Бу — Апас, Чирмешән, Чүпрәле районнары», — диде Рөстәм Миңнеханов. «Сез нәрсә, сукырлар әллә, күрмисезме? Бу балалар һава киңлегендә — укымыйлар, берни дә эшләмиләр. Без бюджеттан акча бирәбез бит. Катгый җәза бирәчәкбез. Мондый нәрсәгә юл куярга ярамый», — диде республика җитәкчесе. Бүген Актанышта мәгариф һәм фән хезмәткәрләренең республика август киңәшмәсе узды. Быел ул «Татарстанда заманча белем бирү — һәркем өчен мөмкинлекләр» темасына багышланды.