Путин: Россиядә балаларга күрсәтелә торган ярдәм әлегә җитәрлек түгел
(Казан, 2 сентябрь, «Татар-информ»). Яңа түләүләр һәм пособиеләргә карамастан, Россиядә балалы гаиләләргә күрсәтелә торган ярдәм әлегә җитәрлек түгел. Ерак көнчыгыш федераль округының социаль-икътисади үсешенә багышлап уздырылган киңәшмәдә Россия Президенты Владимир Путин шулай дип белдергән. Бу хакта РИА Новости хәбәр итә.
«Әлегә туганнан алып мәктәпне тәмамлаганчыга кадәрге тулы бер набор юк, ә ул безнең булырга тиеш. Минем бу хакта беренче тапкыр гына әйтүем түгел һәм Хөкүмәткә әлеге мәсьәлә буенча эшләргә куштым», — дип белдергән ил башлыгы.
Ул россиялеләргә әлеге регион тулаем кызыклырак булсын өчен, Ерак Көнчыгышта яшәүче балалы гаиләләргә ярдәм итүнең специфик чараларын уйларга тәкъдим иткән.
«Капитал кертсеннәр өчен икътисадта кызыклырак шартлар тудырган кебек, гаиләләргә дә шундый шартлар тудырырга кирәк. Аларга балаларын үстерү башка территорияләрдә түгел, нәкъ менә монда файдалырак булсын», — дип аңлатты тәкъдимен Путин.
Элегрәк Федераль Җыенга әзерләгән юлламасында Россия Федерациясе Президенты мәктәп яшендәге балаларга берничә төр ярдәм чарасы булдырырга кушкан иде. Нәтиҗәдә алты яшьтән 18 яшькәчә балалары булган һәм мәктәптә укуларын дәвам итүче 18 яшьтән 23 яшькәчә мөмкинлеге чикле гражданнарга яки аларның опекуннарына бер тапкыр бирелә торган 10 мең сум түләү кертелде.
Моннан тыш, Путин авырып киткән чорда баласы белән өйдә торган әти-әниләргә, стажына карамастан, хезмәт хакының 100 проценты күләмендә түләргә тәкъдим итте. Әлеге яңалык үз көченә 1 сентябрьдән керә, дип язган иде элегрәк «Татар-информ» агентлыгы.