Казанда Мөселман киносы фестивале Чыңгыз Айтматовка багышланган фильм белән ачыла
(Казан, 3 сентябрь, «Татар-информ», Лилия Шәйхетдинова). Казанда XVII Халыкара мөселман киносы фестивале көннәрен танылган язучы һәм җәмәгать эшлеклесенә багышланган «Дни и века Чингиза Айтматова» документаль киносы белән ачалар. «Мондый карарны сайлап алу комиссиясе әгъзалары кабул итте. Башта мин документаль фильмга каршы идем. Әмма бу фильм фестиваль концепциясенә бик яхшы туры килде», — диде «Татар-информ» мәгълүмат агентлыгына Татарстан «Татаркино» директоры Миләүшә Айтуганова. Фильм Чыңгыз Айтматов 1986 елда Иссык-Күл форумында «әйдәп баручы сәясәтчеләрнең, фән һәм мәдәният эшлеклеләренең дөньядагы хәлиткеч процесслар өчен җаваплылыгы, Көнчыгыш һәм Көнбатыш арасындагы диалогны билгеләү турында» күтәргән мәсьәләгә багышланган. Дркументаль фильм 5 сентябрьдә «Мир» кинотеатрында тәкъдим ителә.