Татарстанда җылыту сезонына әзерлек 99 процент тәшкил итә
(Казан, 4 сентябрь, «Татар-информ»).Татарстанда 2021–2022 елгы җылыту сезонына әзерлек тулысынча тәмам диярлек. 3250 котельный алдагы җылыту сезонына әзер, бу гомуми санның 99,5 проценты.
Бу хакта Республиканың Хөкүмәт Йортында узган киңәшмәдә Татарстан Республикасының төзелеш, архитектура һәм торак-коммуналь хуҗалык министры Марат Айзатуллин хәбәр итте. Киңәшмәне барлык муниципаль районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды. Анда шулай ук ТР Премьер-министры Алексей Песошин да катнашты, дип хәбәр итә республика җитәкчесенең матбугат хезмәте.
Республика төзелеш министры сүзләренчә, Татарстанның җиде районында 17 котельныйны гына әзерлисе калган. «16 859 күпфатирлы йортның әзерлек паспорты бар инде. Бу республикадагы барлык йортларның 96,5 проценты», — диде чыгыш ясаучы.
Белем бирү оешмалары буенча җылылык сезонына әзерлек 99,6 процент, сәламәтлек саклау оешмалары буенча — 99,5, мәдәният оешмаларында — 99,6, спорт объектларында – 98 процент. Социаль яклау объектларының әзерлеге тәмамланды», — диде Айзатуллин.
Алдарак «Татар-информ» мәгълүмат агентлыгы Татарстан Республикасы гидрометеорология үзәге мәгълүматларына караганда киләсе атнадан республикада кыраулар төшү ихтималы турында язган иде. Бу ялларда Казанда температура климат нормаларыннан түбәнрәк булачак.