Миңнеханов: Иннополиста бизнесны үстерү, белем алу һәм яшәү өчен инфраструктура бар

(Казан, 6 сентябрь, «Татар-информ»). Бүген Татарстан Президенты Рөстәм Миңнеханов «Иннополис» махсус икътисади зонасының күзәтү советы утырышын уздырды. Ул биредә бизнесны үстерү, белем алу һәм яшәү өчен инфраструктура булдырылуын искәртте. Рөстәм Миңнеханов сүзләренчә, «Иннополис» МИЗ планлы рәвештә үсә. Бүгенге көндә махсус зонада 114 резидент, 29 партнер һәм 102 стартап эшчәнлек алып бара, 4 266 эш урыны булдырылган. Бу турыда Татарстан Президентының матбугат хезмәте хәбәр итте. «Иннополис территориясендә бизнесны үстерү, белем алу һәм яшәү өчен кирәкле инфраструктура булдырылган. Үткән ел азагында икенче технопарк файдалануга тапшырылды. Тагын ике технопарк төзелә, анда 4 мең эш урыны булдырылачак», — диде Рөстәм Миңнеханов. Ул агымдагы елның июнендә «Ю-1» яңа торак микрорайоны төзелешенә старт бирелүен искәртте. Анда Иннополис шәһәрендә проектларны гамәлгә ашыручы компанияләр хезмәткәрләре яшәячәк. Проектны гамәлгә ашыру ИТ-шәһәрнең 8,5 меңнән артык кешесен торак белән тәэмин итәргә мөмкинлек бирә. Утырыш нәтиҗәләре буенча 16 яңа компания «Иннополис» махсус икътисади зонасы резидентлары һәм партнерлары булды. Инвестицияләр күләме 12 млрд сумнан артык, 702 эш урыны булдырылачак. «МедМаркет», «СмартФарм», «Сирин Групп», «Сайберскейп Инвестментс», «Промвад», «Синергия Софт», «ХайтекПарк» компанияләре резидент статусын алды. «КУКА Роботикс», «Дронопорт», «Аквелон-Казан», «БИМэйстер», «НИИАС», «Техкомпания Хуавей», «ТС-Иннотех», «Ак Барс Цифровые Решения», «Озон Технологии» компанияләре партнер булды. «Яңа резидентлар ярдәмендә Лобачевский исемендәге технопаркның проект куәтенә ирешү көтелә. 2022-2023 елларда тагын ике технопаркны — „бумерангларны“ файдалануга тапшыру бик вакытлы булача. Алар да тиз тулыр дип фаразлана», — диде Татарстан Хөкүмәте Йортында узган очрашуда Татарстан Премьер-министры урынбасары Роман Шәйхетдинов.