Татарстанда Covid-19 вирусын йоктыруның 54 яңа очрагы теркәлгән
(Казан, 12 сентябрь, «Татар-информ»). Соңгы тәүлектә Татарстанда коронавирус белән авыруның 54 яңа очрагы теркәлгән.
«Алар арасында 5 кеше чирне читтә йоктырып кайткан, 49 кеше вирусны авыручылар белән аралашканда йоктырган», — дип хәбәр итә Татарстан Республикасы Сәламәтлек саклау министрлыгының матбугат хезмәте.
«Ун кеше хастаханәгә салынды, 44 кеше өйдә дәвалана», — дип ачыклык керттеләр ведомствода.
Иң күп авыручылар Казанда теркәлгән, биредә чир йоктыручылар 25 кеше. Чаллыда авыруның 15 яңа очрагы ачыкланган, ә Түбән Кама һәм Тукай районнарында өчәр очрак бар. Авыру йоктыручылар республиканың сигез муниципалитетында ачыкланган.
Шулай итеп, 2021 елның 12 сентябренә белешмә буенча, пандемия башланганнан бирле регионда рәсми рәвештә 26 063 авыру очрагы теркәлгән. 22 714 татарстанлы савыккан, шул исәптән узган тәүлектә 13 кеше чирне җиңгән.