Казанда мөселман табиблары ковидны дәвалау турында сөйләште
(Казан, 2 октябрь, «Татар-информ», Гадел Әхмәтҗанов). Бүген Казанда беренче тапкыр «Коронавирус: дәвалау һәм профилактика алымнары» дигән фәнни-гамәли конференция булды. Аны «Авиценна» РФ Мөселман табиблары һәм урта медицина персоналы ассоциациясе оештырды. Конференциядә катнашучылар коронавирус инфекциясе, саклык чаралары турында мәгълүмат белән танышты. Утырыш ахырында резолюция кабул ителде. «Конференция азагында коронавирус вазгыятенә бәйле рәвештә, Диния нәзарәтенең вакцинация турындагы карарын хупларга, профилактика чаралары турында методик әсбап булдырырга дигән карарга килдек», — диде Татарстанның атказанган табибы, медицина фәннәре кандидаты Рәшит Җәләлиев «Татар-информ» хәбәрчесенә. «Коронавирус йогышы: дәвалау һәм профилактика алымнары» фәнни-гамәли конференциясендә «кызыл зона»да эшләүче табибларга истәлекле бүләкләр, рәхмәт хатлары һәм мактау грамоталары тапшырылды. Чара чәй табыны белән тәмамланды.