Эксперт: Рус орфографиясенә реформа түгел, аңа өстәмәләр кертү эше алып барыла
(Казан, 11 ноябрь, «Татар-информ»). Мәгариф министрлыгы рус орфографиясе реформасын үткәрми, ә гамәлдәге кагыйдәләрне камилләштерә һәм тулыландыра. РИА Новостига Пушкин исемендәге Дәүләт рус теле институтының фән буенча проректоры Михаил Осадчий әнә шундый фикер җиткерде.
Эксперт искәртеп узганча, проект 1956 елда чыккан орфография кагыйдәләре җыентыгына төзәтмәләр кертә.
«Шушы көннәрдә рус орфографиясен үзгәртеп кору реформасы булды дип санаучылар хаклы түгел. Бүгенге көндә без рус орфографиясе кагыйдәләре җыелмасын камилләштерү һәм тулыландыру эшен алып барабыз. Бернинди үзгәрешләр дә юк, элек безнең игътибар үзәгендә булмаган өлкәләрнең өстәмә һәм детализациясе генә», - дип аңлатты ул.
Осадчий искәртеп узганча, соңгы елларда рус теленә бик күп яңа сүзләр кергән, димәк, гамәлдәге кагыйдәләрдә тутырылырга тиешле урыннар барлыкка килгән. 1956 елдан орфографиянең авторитетлы саналган төрле белешмәләре чыкса да, алар академик кагыйдәләр җыелмасына ия түгел. Кагыйдәләр җыелмасының яңа версиясе - дәүләт органы катнашында академия коллективының эш нәтиҗәсе, бу статус мөһим.