Путин төбәкләрдә транспортта QR системасын җентекләп өйрәнүнең мөһимлеген әйтте
(Казан, 9 декабрь, «Татар-информ»). Транспортта йөрүгә QR-кодлар кертү өчен әлеге системаны Россия төбәкләрендә җентекләп эшләргә һәм тикшерергә кирәк. Бу хакта гражданнар җәмгыятен үстерү һәм Кеше хокуклары буенча совет утырышында Россия Президенты Владимир Путин хәбәр итте.
Ул бу мәсьәләне игътибар белән өйрәнергә, транспорт системасының бу яңалыкка әзерлеген тикшерергә, ашыгыч карарлар кабул итмәскә һәм гражданнарның куркынычсызлыгын тәэмин итәргә кирәклеген искәртте.
«Без сезнең белән, профессиональ бергәлектә, барлык гражданнарның хокукларын гарантияли торган карарлар табачакбыз. Моның буенча игътибар белән эшләячәкбез һәм бернинди ялгыш карарлар да булдырмаска тырышачакбыз», - диде ул.
Җәмәгать урыннарында һәм транспортта QR-кодлар кертү турындагы закон проектлары Дәүләт Думасына 12 ноябрьдә кертелде.
Фикер алышу башланыр алдыннан төбәкләр Дума Сәламәтлек саклау комитетына конкрет төбәкләрдә әлеге системаның эше турында докладлар бирәчәк, шуннан соң беренче укылышка әзерлек башлана.
Исегезгә төшерәбез, 22 ноябрьдә Татарстан, төбәктә коронавирус йогышы белән авыручылар саны арту сәбәпле, бөтен җәмәгать транспортында QR-кодларны Россиядә беренче булып тикшерә башлады.