Илшат Фәрдиев Чаллы шәһәр Советы депутаты вәкаләтләрен вакытыннан алда туктатты
(Казан, 9 декабрь, «Татар-информ», Эльза Кузнецова ). «Сетевая компания» ААҖ генераль директоры Илшат Фәрдиев Чаллы шәһәр Советы депутаты вәкаләтләрен вакытыннан алда туктатты. Бу хакта Автошәһәр Советының X утырышында билгеле булды.
2015 елда Фәрдиев Чаллы шәһәр Советы президиумына керде, дөрес, соңыннан аннан чыкты. Ул әлеге адымны Казанда эше күп булу, вакыт тыгызлыгы һәм Автошәһәрдәге утырышларда катнаша алмау мөмкинлеге белән аңлатты. Берничә елдан соң ул янә шәһәр советына керә һәм 2021 елның 29 ноябрендә вәкаләтләрне туктату турында шәхси гариза яза.
Сессиядә 32 депутат катнашты, әмма Фәрдиевнең отставкага китүенә тавышны барысы да бирмәде.
ТР Дәүләт Советы депутаты Олег Коробченко мэр Наил Мәһдиевтан Илшат Фәрдиевне «җибәрмәвен» сорады. «Без республиканың мондый җитди уенчыларын югалта алмыйбыз. Безнең белән ул шәһәрдә 2-3 ел инде. Ул хәзер дә Казанда яшәсен, тик айга бер генә тапкыр булса да безгә Чаллыга килә алыр иде», — диде танылган бизнесмен.
Наил Мәһдиев Фәрдиев белән озак сөйләшү булуын, ул аны депутат корпусында калырга үгетләвен әйтте, өстәвенә, ул актив һәм мотивацияле депутат. «Әмма бу Илдар Шәех улының аңлы сайлавы. Һәрберебезнең сайлау хокукын хөрмәт итәргә кирәк», - дип искәртте шәһәр башлыгы.
Карар күпчелек тавыш белән кабул ителде.
Илшат Фәрдиев ышаныч белдерүләре өчен рәхмәт әйтте, шулай ук Чаллы аның өчен туган шәһәр булуын, киләчәктә дә Автошәһәргә ярдәм итәчәген җиткерде.
Фәрдиев Чаллыда үскән. 2012 елның маеннан ул «Сетевая компания»не җитәкли, 2018 елның 30 маеннан - Россия чаңгы узышлары федерациясе вице-президенты.