Уфада башкорт теле көне уңаеннан балалар әдәбиятын тәкъдим иттеләр
(Казан, 12 декабрь, «Татар-информ»). Башкортстанның Зәйнәп Биишева исемендәге «Китап» нәшрияты Башкорт теле көне уңаеннан балалар әдәбиятын тәкъдим итте. Бу хакта «Башинформ» агентлыгы яза.
Чарага җыелган кунаклар «Китап» нәшрияты республика Башлыгы Чыршы бәйрәменә чакырылган балалар өчен 2011 елдан бирле бүләк рәвешендә чыгарган 11 китап турында видеоролик карады. Шулай ук 3D һәм 4D форматында (анда кушымта ярдәмендә әкиятне «терелтергә» мөмкин) дөнья күргән башкорт халык әкиятләре мотивлары буенча мультимедиа форматындагы басмалар белән таныштылар.
«Очрашуга балалар китапларының авторлары һәм нәни кунаклар да килгән иде. Җанлы әңгәмә, автографлар өләшү һәм фотосессия аларга бик тә ошады. Һәр кунакка «Китап» нәшриятында дөнья күргән басмалар бүләк иттеләр. Китаплардан тыш, балаларны тәм-томнар белән дә сөендерделәр», - дип искәрттеләр нәшриятның матбугат хезмәтендә.