Яңа Чишмә районында «Полиция Кыш бабае» махсус исемлек буенча йөриячәк
(Яңа Чишмә, 26 декабрь, «Татар-информ», «Яңа Чишмә хәбәрләре» ). 2021 елның 20 декабреннән 2022 елның 10 гыйнварына кадәр Яңа Чишмә районында «Полиция Кыш бабае» дигән пиар-акция уза.
Әлеге акция балигъ булмаганнарның хокукларын һәм законлы мәнфәгатьләрен яклау, күзәтүчесезлекне, караучысызлыкны, көнкүреш җинаятьчелеген профилактикалау буенча эшнең нәтиҗәлелеген арттыру, социаль куркыныч хәлдәге, уңышсыз һәм аз керемле гаиләләрне ачыклау, аларга ярдәм күрсәтү максатыннан үткәрелә.
Полиция Кыш бабаеның кемнәр янына баруы турындагы исемлек авыл җирлеге башкарма комитетлары, мәктәпләр һәм мәктәпкәчә белем бирү учреждениеләре, сәламәтлек саклау, социаль яклау һәм мәгариф органнары ярдәмендә төзелгән.
Исемлеккә дәүләт тарафыннан ярдәмгә мохтаҗ гаиләләр кергән.
Полиция хезмәткәрләре Кыш бабай һәм Кар кызы киемнәрендә балигъ булмаган балаларның куркынычсызлыгын тикшерү һәм хокук бозуларны профилактикалау максатыннан имин булмаган гаиләләрнең өйләренә киләчәк.