Түбән Камада тын юлларында вируслы кискен инфекция белән авыручылар арткан
(Казан, 7 февраль, «Татар-информ», Эльза Кузнецова). Узган атна белән чагыштырганда, Түбән Камада теркәлгән тын юлларында вируслы кискен инфекция белән авыручылар 20 процентка арткан. Ачыкланган очраклар алдагы атнада 2346 булса, хәзер 3086 очрак теркәлгән. Бу турыда Түбән Кама районы башкарма комитеты җитәкчесе эшлекле дүшәмбедә Рамил Муллин әйтте.
Аның сүзләренчә, поликлиникага гына түгел, ашыгыч ярдәмгә дә йөкләнеш зур. Чакырулар саны 9,4 процентка артып, 1631 булган, ә узган атнада — 1477.
«Без авыручылар саны җитди артуын күрәбез, бу „омикрон“ штаммы белән бәйле. Госпитальдә 93 пациент дәвалана, өч кеше үпкәләре ясалма җилләтү (ИВЛ) аппаратына тоташтырылган», — диде Муллин.
Түбән Кама поликлиникалары ялларсыз эшли, дәвалау учреждениеләре табибларына шулай ук йөкләнеш зур.